About Us
နောက်ခံသမိုင်းကြောင်း
မွေးမြူရေးပညာဌာနသည် နိုင်ငံတော်၏မွေးမြူရေးလုပ်ငန်းဖွံဖြိုးတိုးတက်ရေး အတွက် အဓိကအရေးကြီးသော အခန်းကဏ္ဍမှ ပါဝင်ဆောင်ရွက်လျက်ရှိပြီး တက္ကသိုလ်စတင် ဖွင့်လှစ်ခဲ့သည့် ၁၉၅၇ ခုနှစ် ကတည်းက ကျောင်းသား/သူများအား မွေးမြူရေးဆိုင်ရာ ပညာရပ်များကို စာတွေ့/လက်တွေ့ မျှဝေပေးရာအဓိကဌာနကြီး တစ်ခုအဖြစ် ရပ်တည်ခဲ့ပါသည်။
တက္ကသိုလ်စတင်တည်ထောင်ခဲ့သည့် ၁၉၅၇ ခုနှစ်တွင် မွေးမြူရေးပညာဌာန၏ ပထမဉီးဆုံး ဌာနမှူးမှာ Dr. R.B. Griffith ဖြစ်ပါသည်။ ၁၉၈၃ ခုနှစ်တွင် တက္ကသိုလ်ပိုင် သရုပ်ပြမွေးမြူရေးခြံကို မွေးမြူရေးပညာဌာနက တာဝန်ယူ ဆောင်ရွက်ခဲ့ရပြီး ဘွဲ့ကြို၊ ဘွဲ့လွန် ကျောင်းသား/ကျောင်းသူများအတွက် စာတွေ့ လက်တွေ့သင်ကြားမှု အထောက်အကူ များစွာရရှိခဲ့ပါသည်။
၁၉၉၆ ခုနှစ်တွင် ၎င်းသရုပ်ပြမွေးမြူရေးခြံကို မွေးမြူရေးအစားအစာနှင့် နို့ထွက်ပစ္စည်းလုပ်ငန်းထံသို့ လွှဲပြောင်းပေးခဲ့ရသော်လည်း ကျောင်းသူကျောင်းသားများကို လက်တွေ့ပြသရန်အတွက် တက္ကသိုလ်ပိုင် ဒေသနွားမွေးမြူရေးခြံကို ဆက်လက် တာဝန်ယူ ခဲ့ရပါသည်။
ထို့နောက်ဝန်ကြီးဌာန၊တက္ကသိုလ်နှင့် ပြင်ပမွေးမြူရေးကုမ္ပဏီများ၏ ပူးပေါင်း ဆောင်ရွက်မှုဖြင့် သင်ကြားမှုအထောက်အကူပြု သရုပ်ပြမွေးမြူရေးခြံများ ဆက်လက် ပေါ်ပေါက်ခဲ့ပါသည်။ ၂၀၁၀ ခုနှစ်တွင် တက္ကသိုလ်နှင့်မြန်မာစီပီလိုက်ဖ်စတော့ခ် ကုမ္ပဏီတို့ ဖက်စပ်ပူးပေါင်း၍ သရုပ်ပြကြက်မွေးမြူရေးခြံများ (အသားစားကြက်နှင့်ဥစားကြက်)၊ သရုပ်ပြ နွားမွေးမြူရေးခြံတို့ကိုတည်ဆောက်ဖွင့်လှစ်ခဲ့ပါသည်။ ၎င်းခြံများကို မြန်မာစီပီလိုက်ဖ်စတော့ခ် ကုမ္ပဏီမှ အဓိကတာဝန်ယူဆောင်ရွက်ပြီး အခြားလိုအပ်သည့် အရာများကို တက္ကသိုလ်မှ စီစဉ်ထောက်ပံ့ပေးပါသည်။ ၂၀၁၆−၂၀၁၇ ပညာသင်နှစ်တွင် သရုပ်ပြနို့စားနွားမွေးမြူရေးခြံနှင့် ၂၀၂၀-၂၀၂၁ ပညာသင်နှစ်တွင် သရုပ်ပြ ဝက်မွေးမြူရေးခြံတို့ကို နိုင်ငံတော် ဘတ်ဂျက်ဖြင့် ထပ်မံတည်ဆောက်ခဲ့ပါသည်။ ထို့အပြင် ၂၀၁၇ခုနှစ်တွင် Japfa Company Ltd. နှင့် မွေးမြူရေးဆိုင်ရာဆေးတက္ကသိုလ်တို့ ပူးပေါင်း၍ သရုပ်ပြ အသားတိုးနွားမွေးမြူရေးခြံနှင့် စားကျက်မြေ ၇ ဧကတို့ကိုဖော်ဆောင်ခဲ့ပါသည်။ အထက်ပါသရုပ်ပြမွေးမြူရေးခြံများတွင် မွေးမြူရေးပညာဌာန၏ ဦးဆောင်ကြီးကြပ်မှုဖြင့် ဘွဲ့ကြိုကျောင်းသားကျောင်းသူများ လက်တွေ့ လေ့လာရန်နှင့် မဟာဘွဲ့နှင့် ပါရဂူဘွဲ့သင်တန်းသားများအတွက် သုတေသန ပြုလုပ်ခြင်းများတွင် များစွာ အထောက်အကူဖြစ်စေခဲ့ပါသည်။
ဌာနမှူး၏အမှာစကား
လူသားတို့ အသက်ရှင်ရပ်တည်မှုအတွက် အရေးကြီးဆုံးလိုအပ်ချက် သုံးခုဖြစ်သော စားရေး၊ ဝတ်ရေးနှင့် နေရေးတို့တွင် စားရေးသည် အသက်ရှင်သန်မှုအတွက် ပဓာနအကျဆုံး လိုအပ်ချက် ဖြစ်ပေသည်။ စားရေးဟုဆိုရာတွင် အဟာရဓာတ်ပြည့်စုံမျှတစွာ စားသုံးရမှုသည် အသက်ရှင် ရပ်တည်မှုအတွက်သာမက ကျန်းမာအသက်ရှည်ရေးအတွက်လည်း လွန်စွာအရေးပါ လှပေသည်။ ထိုသို့ အဟာရဓာတ်ပြည့်စုံမျှတစွာ စားသောက်သည်ဟု ဆိုရာတွင် ခန္ဓာကိုယ်အတွက် လိုအပ်သော ပရိုတင်း၊ အဆီ၊ ကာဗိုဟိုက်ဒရိတ်၊ ဗိုက်တာမင်နှင့် သတ္ထုဓာတ် တည်းဟူသော အခြေခံလိုအပ်ချက်များ ညီညွတ်မျှတပြည့်စုံစွာ စားသောက်ကြရပေသည်။ လူတို့၏ အသက်ရှင်သန်ရပ်တည်မှု၊ ကျန်းမာကြံ့ခိုင်မှုတို့အတွက် အဓိကလိုအပ်သော ပရိုတင်းဓာတ် ခေါ် အသားဓာတ်၊ နို့နှင့် ဥများကို တိရစ္ဆာန်မွေးမြူရေး လုပ်ငန်းမှသာ ဖြည့်ဆည်းပေးကြရသည်။
ထို့ကြောင့်ပင် လူတို့ အသက်ရှင်ရပ်တည်မှုအတွက် အဓိကလိုအပ်ချက်ကို ဖြည့်ဆည်းပေးနိုင်ရန် အတွက် နိုင်ငံတိုင်းတွင် ပြည်သူများအတွက် မွေးမြူရေး လုပ်ငန်းများကို လုပ်ဆောင်ကြရသည်။ မွေးမြူရေးပညာရှင်များကို မွေးထုတ်ကြရသည်။ မွေးမြူရေးပညာရပ်များကို တိုးတက်ထွန်းကား ပြန့်ပွားအောင် ဆောင်ရွက်ကြရသည်။ မြန်မာနိုင်ငံတွင်လည်း ၁၉၅၇ ခုနှစ် မွေးမြူရေးဆိုင်ရာ ဆေးတက္ကသိုလ်၏ ပင်မသန္ဓေ တည်ရာ ရန်ကုန်မြို့ အင်းစိန် တိရစ္ဆာန်ဆေးကုသရေးနှင့် မွေးမြူရေးသင်တန်းကျောင်း စတင်တည်ထောင်စဉ်ကထဲကပင် မွေးမြူရေးပညာ ဘာသာရပ်ကို ထည့်သွင်းပြဌာန်း သင်ကြားပို့ချပေးခဲ့သည်။ ထိုသို့ အစဉ်အလာကြီးမားခဲ့သော မွေးမြူရေး ပညာဌာနတွင် ကျွန်မသည် ပါမောက္ခ/ဌာနမှူးအဖြစ် ၂၀၁၁ ခုနှစ်မှ ယနေ့ထက်တိုင် ဂုဏ်ယူစွာ တာဝန်ထမ်းဆောင်ခွင့် ရရှိခဲ့ပါသည်။
မြန်မာနိုင်ငံသည်လည်း မွေးမြူရေးကဏ္ဍ၏အရေးပါအရာရောက်ပုံကို ကောင်းစွာ သဘောပေါက်သိရှိနားလည်သော နိုင်ငံတစ်ခုဖြစ်သည်နှင့်အညီ မူလက တိရစ္ဆာန်ဆေးကု ပညာရပ်ကိုသာ အဓိက ဘာသာရပ်အဖြစ် သင်ကြားပို့ချ မွေးထုတ်ပေးခဲ့သော အမိတက္ကသိုလ်တွင် ၂၀၁၄ ခုနှစ်မှ စတင်၍ မွေးမြူရေးပညာ အထူးကု BASc ဘွဲ့ကိုပါ ဖော်ထုတ်တီထွင်ပြီး အနာဂတ် နိုင်ငံတော် အတွက် သားငါးကဏ္ဍလိုအပ်ချက်ကို ဖြည့်ဆည်းပေးနိုင်မည့် မွေးမြူရေးပညာရှင်များ မွေးထုတ် ပေးစေနိုင်ရန် စီစဉ်ဆောင်ရွက်ခဲ့ကြပြီးဖြစ်ပါသည်။ အမှန်စင်စစ်တွင်လည်း မွေးမြူထုတ်လုပ်သူ ပညာတတ်များ မွေးထုတ်ပေးနိုင်မှသာ နိုင်ငံသားတို့အတွက် သား၊ ငါး ဥ၊ နို့စသော ပရိုတင်းဓာတ်လိုအပ်ချက်ကို ပြည့်စုံအောင် ဖြည့်ဆည်းပေးနိုင်မည်ဖြစ်ပေသည်။ နေ့စဉ်တိုးပွားနေသော လူဦးရေအတွက် သား ငါး ဥ နို့ လိုအပ်ချက်သည် အမြဲတစေ တိုးတက် လိုအပ်နေမည်သာဖြစ်သည်။ အဆိုပါလိုအပ်ချက်ကို ဖြည့်ဆည်းပေးနေသည် ကလည်း မွေးမြူရေး လုပ်ငန်းများကသာ အဓိကကျသည်မို့ နိုင်ငံတော်နှင့် ပြည်သူတို့အတွက် သား ငါး ဥ နို့ လိုအပ်ချက် များကို ဖြည့်ဆည်းပေးနိုင်မည့် မွေးမြူရေးပညာရှင်များ မွေးထုတ်ရာတွင် အရေးပါ အခရာကျ လှသော မွေးမြူရေးပညာဌာနနှင့် မွေးမြူရေးဆိုင်ရာ ဆေးတက္ကသိုလ်တို့သည် အမိနိုင်ငံတော် တည်ဆောက်ရေးအတွက် အုတ်တစ်ချပ် သဲတစ်ပွင့် ပါဝင်ဆောင်ရွက်ခွင့် ရရှိနေမည်သာ ဖြစ်ပါကြောင်း မွေးမြူဆေးကု တိုင်းပြည်ပြုနေမည်သာ ဖြစ်ပါကြောင်း ရည်ညွှန်းလိုက်ရပါသည်။
Graduations
In the University of Veterinary Science, the Master of Philosophy program was introduced and delivered the M.Phil degree holders in 1992. After that the Master of Veterinary Science program was initiated and the first candidate for MVSc degree was produced in 1994. Department of Animal Science has produced the following post graduate degree holders.
